與其選「行業」,不如揀個好「環境」

發佈於 2017-05-08 11:52:00

好多人揀職業既時候都先以行業為考量,認為必須從事一D未來大趨勢既行業。老老實實,冇人可以百分百睇中一個行業既前景,尤其現今世代已經進入所謂既「棋盤下半局」,一切發展都係以指數形式成長,企業平均壽命不斷減少。你而家覺得係大趨勢既行業,可能幾年內就會俾新技術取代。所以我建議與其以「行業」為導向,倒不如好好選個「環境」,畢竟環境比行業更能影響一個人。

環境造就你既為人

縱觀各類型公司,不論係博彩、酒店、旅遊、金融或銷售,每間公司都有各自既辦事風格,就算係同一行業既公司都會有截然不同既處事方式、為員工培養出一套獨特既邏輯思維。而呢套思維,唔單止影響一個人既做事方式,仲包括思考模式同態度。

就好似一個組織係討論案例既時候,如果一個問題出現,整個組織既人都會卡住係同一個節點上。比如話呢間公司自由度好大,風氣非常開明,咁整個組織既人想法都非常自由大膽,但可能好難統一。如果組織係習慣性只聽老闆指揮,咁全部人都會紋風不動,聽指令行事。

好難講話邊種好邊種唔好,畢竟公司會採用呢種文化往往有歷史因素同自身既考量相互影響。重點係,處身於呢個組織既所有人都會變得越來越相似。呢種變化仲會係大家無意識,逐漸咁侵入到每個人既身體裡面。唔難理解既,因為唔習慣呢種公司文化既人,會因「個人因素」而默默離開,剩低既人自然就會趨向相近。

所以我認為,當你進入一間公司之後,唔洗太著重工作內容,反而應該優先觀察自己既觀念同公司整體文化有冇太大出入。如果你第一日就唔妥你上司、唔同意佢既行事風格同價值觀,就應該盡快離開,而唔係死頂死撐。否則,無論你當初有幾堅決,都會慢慢被同化,到最後成為你當初最睇唔起既人。而呢個轉變係註定會發生、冇得避既。

唔係每個環境,都有你發光既機會

另一個環境比行業緊要既原因,在於就算係同一個職位係唔同公司既「知覺價值」都係有所差異。同樣你識某種技術,A公司可能好重視,但係B公司可能不以為然。除非你識既係對方最核心既技術,咁樣同一行業既每間公司都會非常重視。但如果你識既係一種非核心,同關鍵技術連動性低既技術,就另當別論了。

比如話銀行業,有部份銀行好重視新科技、資訊系統建構發展;而其他就係比較傳統,注重線下用戶體驗。咁作為一位資訊科技人員,係呢兩間公司受重視既程度同出頭既機會都會有所區別。又或者製造業,每個產品都需要包裝,但每間公司既審美程度同美感都有各自既定義,作為一個美術人員都會受到不同既重視程度。所以你叻唔代表呢間公司就會認可你既技能。

因此,你必須明白:你一定要選擇一個可以產生價值既地方,咁你既能力先有機會俾人睇到!

簡以言之,後生既,記得優先揀一個需要你既能力,可以令自己發揮價值既地方。一離你可以有更多機會,更容易脫穎而出。二來因為你會被重視、被需要,亦都容易參與有趣、好玩又重要既工作內容。綜合以上兩點,你亦都會更易獲得成就感。整個情況都係一個「正向循環」,令你更容易走入「爆發性成長」既狀況。

如果公司文化又係好掂既,咁你唔洗幾耐就可以達到一個別人無法企及既高度!

總結

所以,與其選產業,不如選環境。 一個你認可既工作環境,透過正向影響不斷提升自己既思考層級。而一個可以令自己發光發熱既環境,亦都可以令自己更容易被看到,進而產生更多價值。咁就可以令自己迅速踏上職場正循環,而唔係每日抱怨既冤鬼。

 

讚好我們的Facebook專頁,好工一網打盡!

FastFind-Job快搵工